Nynorskprosjekt på 5. trinn på Lovisenlund skole

Måndag 11. april var 5. trinnet på Lovisenlund klar for å lese nynorsk. Nokre få hadde lese nynorskbøker før, og nokre hadde også sett filmar som er bygd på eit par av bøkene eg hadde med.

Det er mange elevar på trinnet, og etter presentasjonen fekk dei gå inn gruppevis på romet ved sida av og låne. Her vert bøkene liggjande under leseperioden, slik at elevane heile tida kan gå inn og skifte ut og låne nye.

Kontaktlæraren for trinnet, Anne-Lise Stangenes, har lagt opp til heimelekse og fleire timar lesing på skulen i perioden, så dei fleste skulle bli godt kjent med nynorske bøker i dei neste vekene.

Som vanleg var det mange som fann ei bok å lese i med ein gong, medan andre måtte tenkje seg meir om. Då er det fint å få tips av dei andre i klassen om bøker som er "gøye".