Vestlendingar overtek Bokdykk

Det Norske Samlaget har trekt seg ut av nettbokhandelen Bokdykk og Blåmann barnebokklubb. Dei lokale investorane Trond Økland og Michael Dorfman frå Florø skal drive selskapet vidare som ein nynorskprofilert kulturbokhandel på nett og barnebokklubb for nynorske bøker.

- Vi har inngått gode samarbeidsavtalar med "nye" Bokdykk og eg er svært nøgde med at det vi har vore med og bygd opp no vert drive vidare av lokale krefter. For oss er det viktig og riktig med ein nasjonal nettbokhandel som profilerer nynorsk litteratur, og vi er glade for at dei også ønskjer å satse vidare på den nynorske barnebokklubben Blåmann. Samlaget skal no konsentrere seg om kjerneverksemda som er å utvikle gode bøker og forlagsprodukt, seier forlagsdirektør i Samlaget, Tove Lie.

- Vi ser fram til å drive Bokdykk og Blåmann vidare som eit frittståande nettbasert selskap, seier Trond Økland, og er glad for mogelegheita til å utvikle konsepta vidare, bygd på det gode arbeidet som allereie er gjort. Det er spennande tider i bokverda, og vi planlegg vidare utvikling av nettportalane til glede for norske lesarar.

Bokdykk AS blei oppretta i 2007 av Samlaget og Økland Invest. I 2008 blei barnebokklubben Blåmann også ein del av selskapet.