Til lukke med samisk nasjonaldag

Sameminister Rigmor Aaserud var på markeringa av den samiske nasjonaldagen i Samisk barnehage på Tøyen. På biletet ser vi Elin Kåven som dansar for borna og ministeren.

Noregs Mållag meiner det er ein menneskerett å få bruke språket sitt og hevde kulturen sin. Mållaget stør alt arbeid som kan føre til at denne retten vert til røyndom. For Noregs Mållag er det sjølvsagt at norskspråklege born i dei samiske områda skal ha opplæring i samisk. Det er gledeleg at talet på elevar som lærer samisk, har auka dei siste åra.

Noregs Mållag meiner at samisk språk òg må synleggjerast utanfor det reint samiske området. Samisk må kome til synes i offentlege dokument og i offentlege bygningar, til dømes gjennom skilting på hovudflyplassen på Gardermoen. På den måten kan storsamfunnet verte minna om at vi har eit samisk urfolk og ein samisk nasjon i landet vårt.