Sak nr 7 Den språkdelte kulturen inn i barnehagen

Språkstimulering er ei av dei viktigaste oppgåvene for barnehagen. Stortingsmeldinga 41, Kvalitet i barnehagen (2008-2009) framhevar at dette er ei grunnleggjande oppgåve for barnehagane. For Mållaget som er oppteke av nynorsken spesielt og språkmangfaldet generelt, er dette oppløftande. Men vi må sikra oss at nynorsken vert ein del av språkmiljøet og språkstimuleringa i barnehagen.

Vi vil gjerne at ungar som veks opp i nynorskområde skal bli trygge i nynorsken så tidleg som mogleg. Og for ungar som har sin barndom i meir tradisjonelle bokmålsområde, er det viktig at dei møter nynorsken i bøker, songar og leikar. Og på den måten vert vande med at nynorsken er ein del av språkmangfaldet i Noreg.

I dag er det ikkje sjølvsagt at ungane møter nynorsk i barnehagen. Dei vaksne i barnehagen kan leggja til rette for språkstimulering ved å bruka bøker, språkleikar og songar aktivt. Og dette treng slett ikkje å vera berre på bokmål. Barn utviklar kulturell toleranse når dei vaksne er modellar for toleranse.

Saka om Den språkdelte kulturen i barnehagen skal gje kunnskap om korleis dei tilsette i barnehagane kan bruka det språklege mangfaldet i og rundt barnehagen. Det skal også gje inspirasjon til korleis mållaga kan arbeida for meir nynorsk i barnehagane. I tillegg til at det vil vere rom for å drøfta kva verkemiddel Mållaget rår over og kva som bør vera våre politiske krav til Kunnskapsdepartementet, dei offentlege barnehageeigarane; kommunane og dei private barnehageeigarane.

Noregs Mållag har sett i gang ein kampanje som heiter: Gjennom ord blir verda stor – kampanje for nynorsk i barnehagen. På landsmøtet vil vi presentera det politiske grunnlaget og planane for kampanjen, i tillegg til det nye materiellet retta inn mot tilsette i barnehagane, foreldre med ungar i barnehagen og til ungane. Dette skal vere materiell som kan brukast av alle laga våre over heile landet. Følg også med på våre kampanjesider på www.nm.no