– Den tyngda Mållaget kan ha, er avhenging av medlemstal. Aukande medlemstal fortel heile verda at dette er ein organisasjon med styrke og framgang, slår Åsmund Lien fast. Han er nestleiar i Noregs Mållag og medlem i verveutvalet.

Den mest effektive måten å verva nye medlemer på er å spørja folk om dei ynskjer å verta medlemer i Noregs Mållag. Ofte er det slik at folk set pris på å få spørsmålet og at ein får positivt svar.

Som ein del av verveplanen kan styret eller vervegruppa setja seg ned og skriva ned alle dei kjenner i lokalmiljøet som burde spørjast om å verta med i mållaget. Desse kan ein kontakta på telefon.

Noregs Mållag har ei eiga organisasjonshandbok som laget ditt kan få gratis ved å kontakte skrivarstova i Oslo. Her skal du få nokre gode utdrag frå denne boka.