Tvinnereim sa at prisen kom uventa, og at han når han såg på lista over tidlegare vinnarar, skjøna at prisen hang høgt.
I grunngjevinga frå målprisnemnda heiter det mellom anna at Tvinnereim skriv variert, presist og folkeleg, og at mange akademikarar har mykje å lære av han språkleg. Han er også ein omtykt folketalar og ein god ambassadør for nynorsk i munnleg framføring.
Tvinnereim, som elles har ein lang og innhaldsrik karriere bak seg i akademia, og som også har vore ei drivkraft i målrørsla, sa at han inntil nyleg hadde vore eldre, men at han no etter å ha passert 75, hadde vorte gammal. Likevel vona han at han framleis kunne utvikle seg både som skribent og talar.
Også Ørsta Mållag delte ut sin målpris under møtet, og den gjekk til Runar Gudnason, som nærast har vakse opp i Aasen-tunet. Gudnason, som no har flytt heim til Ørsta, takka like godt for prisen med ein kvikk og humoristisk rap.
Heile det sitjande styret vart attvalt. Terje Kjøde frå Ørsta held fram som leiar. Med seg i styret har han Kristian Fuglseth, Hareid, Iselin Nevstad Øvrelid, Ulstein, Kristian Almås, Stordal og Tore Krøvel Dahl, Ørsta. Årsmeldinga og rapportane frå lokallaga viser at det er god aktivitet i dei fleste lokallaga, og at medlemstalet har auka så monaleg siste åra at det no nærmar seg tusen.