– Takk for at du er med å vise at nynorsk òg er eit motespråk, sa leiar i Mediemållaget Berit Rekve då ho sist torsdag gav blome til redaktøren i Elle Norge, Signy Fardal.
Høvet var at redaktøren i den norske utgåva av verdas største motemagasin for første gong let trykka ein artikkel på nynorsk.
– Vi veit at ein del av lesarane våre er nynorskbrukarar, sa Fardal under overrekkinga.
– Det er like lite overraskande som å sjå ein kvinneleg taxisjåfør.
Og kva er då meir naturleg enn å gje dei motestoff på eiga målform? I aprilutgåva av bladet finn ein fem sider om «Hemmelege hårtriks frå A til Å». Ifølgje Signy Fardal er dette berre byrjinga. Neste månad lovar ho eit intervju med den amerikanske superstjerna Jessica Simpson – på nynorsk.
– Redaksjonen synest berre det er gøy, sa redaktøren, som ikkje såg nokon grunn til å lata det bli med dette.
I ti år har Elle påverka klesmoten. Kan henda vil dei i framtida også påverka språkmoten.
Tekst og foto: Arne Olav L. Hageberg