Melsom-prisen 2009 til Stephen J. Walton

Melsom-prisen 2009 går til Stephen J. Walton for boka Skaff deg eit liv! Om biografi som kom ut på Samlaget i 2008.

Frå juryen si grunngjeving:
"Walton er professor i nynorsk skriftkultur, noko som burde borge for språkleg kvalitet. Det gjer det då også. Forfattaren skriv eksemplarisk, ledig nynorsk, som det er ei glede å lese. Framstillinga er lett tilgjengeleg, humoristisk og stilistisk smakfull. Også folk som ikkje er særskilt interesserte i biografifaglege utfordringar, vil få ei god lesaroppleving, i tillegg til at dei kan risikere å bli opplyste og få seg ein god latter på kjøpet. (...) Han tematiserer også biografens ståstad ved å setje ting på spel. I desse personlege essaya pressar han både seg sjølv og språket utan at det verkar kalkulert eller utleverande."

I juryen: Hilde Sandvik, Åshild Nordstrand, Brit Bildøen

Skipsreiar Ferd. Melsoms legat vart skipa i 1922. Formålet er «fremme av det norske sprog (landsmålet)». Det blir delt ut ein pris kvart år til ein forfattar (eller omsetjar) som året før har gitt ut ei verdifull bok som «efter sitt innhold kan egne sig til folkelæsning og masseutbre¬delse». Legatet blir styrt av Det Norske Samlaget. Melsom-prisen er forlagsuavhengig, alle forlag kan sende inn nynorske bøker til vurdering.

Prisen er på kr 40000.

(Pressemelding frå Samlaget)