10 år med Nynorskstafetten

Publisert: 24. oktober 2023 Sjå aktueltsaker

Denne veka legg Noregs Mållag og Norsk Målungdom igjen ut på ein ny nynorskstafett. I år er tiande året med stafett, og for nokre år det har vore!

Vi har reist på kryss og tvers i Noreg med skiftande stafettbilar og skiftande mannskap. Starten på Nynorskstafetten var i Språkåret 2013. Då feira Noregs Mållag og Norsk Målungdom Ivar Aasen med å reise på Nynorskstafett i godt over 150 dagar. Seinare har det blitt om lag 3 veker kvar haust.

Sånn starta det heile. Her er stafetten i Valdres i 2013.

Me har fått oppleve litt av kvart gjennom 10 år.

Det er stas når nynorskstafetten kjem på besøk. Knut Magnus Nordal i Lyefjell barnehage i Time på Jæren i 2021.

Stafetten har mest vore oransje, men i 2015 var det grøn pynt på bilen.

Kjekt med gåver frå nynorskstafetten! Her er vi i ein barnehage i Gausdal i 2016.

Stafettpinnen er sjølvsagt med på stafett. Her er Magne Aasbrenn og Fredrik Hope 2017.

Me har opplevd litt av kvart i høve nynorskstafetten. Til og med plagiaststrid! https://www.fvn.no/nyheter/okonomi/i/laPL9/noregs-maallag-og-avinor-i-plagiatstrid

Me kjem ikkje med tomme hender, her har Inger i Maurtuva barnehage i Bø i Telemark nett fått levert ei ny bok til barnehagen.

Stjernelag på stafett i 2017. Hege Lothe, Live Havro Bjørnstad og Elise Tørring

Me tek også turen inn i klasseromma.

Nynorskstafetten har også fått mykje mediemerksemd. Her blir Gunnar Ottne intervjua i 2013.

I 2018 var Fyresdal ein av stoppestadane.

Stafett i Trollveggen i 2019.

Nynorskstafetten handlar om å snakke om nynorsk med ordførarar, kommunedirektørar, oppvekstsjefar, tilsette i barnehagar og på skular, med ungdomsråd, på bibliotek og med lokalt næringsliv for å nemne nokre. På kvelden er det mållagsmøte med lokale mållag.

– For Mållaget er dette eit svært godt høve til å få snakka direkte med mange som er svært viktige for nynorsk skriftspråk i det daglege. Det er viktig for oss at nynorsken er i bruk og at kommunane ser kor viktige dei er for skriftspråket i lokalsamfunnet, fortel Peder Lofnes Hauge, leiar i Noregs Mållag.

Fyrste stafettveka er det dagleg leiar Gro Morken Endresen og Per Henning Arntsen frå Noregs Mållag, og Synne Solberg, nestleiar i Norsk Målungdom som er i bilen. Denne fyrste nynorskstafettveka vil også den suksessrike nynorskforfattaren Maria Parr møte elevar i Lom, Skjåk og Vågå og Svein Olav Langåker, dagleg leiar i LNK, vil vere med på nokre av dagane.

I 2023 skal Nynorskstafetten innom Nord-Fron, Sør-Fron, Sel, Vågå, Skjåk, Lom, Dovre, Lesja, Rennebu, Melhus, Skaun, Orkland, Tingvoll, Gjemnes, Sunndal, Surnadal, Aukra, Hustadvika og Molde.