Landsmøte 2026

Noregs Mållag skipar sitt 104. landsmøte fredag 24. til sundag 26. april 2026.

Møtet er på Radisson Blu Airport Hotel på Gardermoen. Hotellet ligg i gangavstand frå flyplassen.

Landsmøtet er det høgste organet i Noregs Mållag og vedtek både politikk, strategi og økonomien for organisasjonen. Det vert aktuelle innleiingar, politisk ordskifte og val av nytt styre i Mållaget. Det blir gode kulturinnslag og bra målfolk frå heile landet, så dette er absolutt noko å få med seg.

Val av utsendingar
Møtet er ope for utsendingar frå lokallag, fylkeslag og yrkesmållag. Desse vert valde på årsmøta i laga på nyåret. Har du lyst å vera med på årsmøte i laget ditt? Følg med når dei sender innkalling. Du kan også ta kontakt med leiar i laget. Kontaktinfo finn du i lagsoversynet.

Korleis skal me jobba for meir nynorsk?
På landsmøtet skal organisasjonen samla seg om nytt arbeidsprogram for 2026–2030. Fyrsteutkastet er no ute på høyring. Høyringsfristen er 29. januar 2026. Send innspel og endringsframlegg til framlegg@nm.no

Kven skal styra Noregs Mållag?
Alle i styret blir valde for to år og er på val kvart ordinære landsmøte. Valnemnda vil gjerne ha grunngjevne framlegg til nye styrefolk. Send innan 15. desember til valnemndsleiar Marit Aakre Tennø, eller klikk her for kontaktinfo til valnemnda.