Bukkane Bruse på badeland kjem på nynorsk!
Ei av Noregs mest selde barnebøker kjem no på nynorsk. Noregs Mållag og Cappelen Damm lanserer nynorskutgåve av den populære boka Bukkane Bruse på badeland av Bjørn F. Rørvik og Gry Moursund.
Peder Lofnes Hauge, leiar i Noregs Mållag, er svært glad for at den moderne barnebokklassikaren kjem på nynorsk.
– Alle born fortener å bli lesne for eller lese gode bøker på sitt eige språk. Eg er skikkeleg nøgd med at denne fantastiske boka no kjem på nynorsk, seier Peder Lofnes Hauge.
Han legg til at det er viktig at både heimane, barnehagane og skulane har tilgang på gode, nynorske barnebøker.
Bukkene Bruse-universet er svært populært blant unge lesarar, bøkene har nådd eit opplagstal på over ein million fysiske utgjevingar, og den originale Bukkene Bruse på badeland-boka har åleine eit opplag på over 250 000. Boka kom ut for fyrste gong i 2009, og har sidan fått Kulturdepartementets barnebokpris og blitt både teater, film og musikk.
– Det er ein demokratisk rett å bli trygg i eige språk, uavhengig av kor stort eller lite språket ditt er. «Gjennom ord blir verda stor» er eit godt, nynorsk ordtak, og med denne utgivinga er den nynorske barnebokheimen blitt endå litt større. Vi i Cappelen Damm er glade for å kunne vere med på å byggje språkleg sjølvtillit hos unge nynorskbrukarar, med Bukkane Bruse, sier Ragnfrid Trohaug, forlagssjef for barnebøker hos Cappelen Damm.
Bukkane Bruse på badeland kan tingast frå nettbutikken til Noregs Mållag eller du kan spørje etter den i bokhandelen din.
Boka er også ein del av prosjektet Nynorsk tøyveskebibliotek, som Mållaget lanserer i haust. Prosjektet er finansiert med midlar frå Utdanningsdirektoratet. Nynorsk tøyveskebibliotek går ut til 30 barnehagar i heile landet som får kvar sine fem tøyvesker fylte med bøker til utlån i heimane.
Vil du kjøpe boka? Klart du kan! Sjå innom nettbutikken Krambua!