Tidlegare mållagsleiar vert statssekretær
I statsråd i dag vart Oddmund Løkensgard Hoel (Sp) oppnemnd som statssekretær for forsknings- og høgareutdanningsminister Ola Borten Moe (Sp).
Oddmund Løkensgard Hoel var leiar i Noregs Mållag frå 1999 til 2002. Sidan har han vore leiar i Luster Mållag, og har vore utsending på landsmøtet med ujamne mellomrom. Siste oppdraget for Mållaget var at han var medlem i prinsipprogramnemnda som har laga framlegg til nytt prinsipprogram for Noregs Mållag.
I Hurdalsplattforma skreiv regjeringa at dei vil sørgje for at norsk språk blir løfta fram i høgare utdanning og forsking.
Dette er eit politisk felt statsråd Ola Borten Moe allereie har engasjert seg i, og det er eit saksfelt Oddmund Løkensgard Hoel kjenner godt som professor i historie ved Høgskulen på Vestlandet.
– Oddmund Løkensgard Hoel har ei god forståing for norsk som fagspråk og nynorsk i akademia. Vi kjenner han som ein stor målpolitisk kapasitet, og det er bra å ta med seg i eit viktig arbeid for Noreg. Eg ynskjer Oddmund til lukke og lukke til, seier Peder Lofnes Hauge, leiar i Noregs Mållag.