Ny vår for Landbruksmållaget
Det er på tide å blåse nytt liv i Landbruksmållaget!
Måndag 24. mars 2025 vert det invitert til oppattskipingsmøte. Møtet vert i forkant av Grovforkongressen 2025 på Gardermoen, og vert eit hybridmøte der det er mogleg å møta fysisk eller digitalt.
Føremålet med Landbruksmållaget er å ta vare på og vidareutvikla det nynorske fagspråket innan landbruket. Tilsette i NLR, NIBIO, rådgjevinga til TINE, landbruksforvaltinga og tilsvarande er hovudmålgruppa, men andre er sjølvsagt òg velkomne.
Oppgåvene til eit slikt lag kan vera:
1. Hjelpa folk som ynskjer det med nynorsk fagspråk og/eller god språkføring, både gjennom rådgjeving og drøfting blant fagfellar. Der det finst fleire nynorske fagtermar for same fenomenet, ynskjer ikkje laget vera normerande, men helst presentera mangfaldet.
2. Spreia fagartiklar og andre nynorske arbeid til medlemene med eit jamleg medlemsbrev. Ei årleg særutgåve av dette må koma med eit oversyn over offentlege gradsoppgåver innan agronomi på nynorsk.
3. Ei tredje side som kan vera interessant for forskarar, er hjelp til å formidla engelsk-språklege resultat.
4. Vert der god kveik i laget, kan det løyva pris til gode føredøme. Prisen treng ikkje vera meir enn ein blome og eit diplom.
Vonleg er dette ei vidfemnande nok aktivitet til at der grunnlag for eit lag. Laget kan leggja til seg fleire oppgåver om medlemene tykkjer so. Folk som sit i ulike posisjonar – rådgjevarar, forvaltarar – har kanskje andre ting som brenn.
Er du interessert? Du kan melde deg inn i Landbruksmållaget eller om du allereie er medlem i Mållaget, så kan du bli sidemedlem i Landsbruksmållaget. Send e-post direkte til medlem@nm.no eller meld deg inn her: Bli medlem!
Ynskjer du å bli aktiv, bli styremedlem eller få meir informasjon om Landbruksmållaget?
Ta direkte kontakt med Åsmund Kvifte: e-post: aakvifte@gmail.com telefon: 95 47 12 47