Nytt lokallag i Arendal
I mars var det ekstraordinært årsmøte i Austegdelaget i Arendal. Austegdelaget har vore lokallag i både Noregs Ungdomslag og Noregs Mållag. Den 25. mars var det stor semje om å dele laget i to.
Arendal dialekt- og mållag er skipa som nytt lokallag, medan Austegdelaget held fram i Noregs Ungdomslag. Det nye lokallaget er allereie godt i gang med aktiviteten.
– Arendal dialekt- og mållag vil gjennom arrangement, diskusjonar og samarbeid støtte opp om arbeid for dialekta og dialektene i Arendal, og om nynorsken, seier Jan Kløvstad, som er vald til den fyrste leiaren i laget.
Det nye styret er Jan Kløvstad (leiar), Anne-Brit Dræge, Helge Tveiten, Eivind Tøn og Liv Paulsen med Hildegunn Sjo og Mette Sætra som varamedlemmer.
Kultursommar
Første arrangement er allereie 6. mai. Då er det møte om Magnhild Hagelia, som var måldame og medlem i Austegdelaget på 1920-talet. Ho var seinare stortingsrepresentant for Ap og første kvinne som lagtingspresident og første norske kvinne i Nordisk råd. Denne kvelden er eit samarbeid mellom fleire, med føredrag av biografen Alf-Kjetil Igland.
– I sommar har vi saman med Austegdelaget og Folkeakademiet to konsertar i Bakgården i Arendal, fortel Jan Kløvstad. Først 19. juni med Frå hav til hei med Kirsten Bråten Berg og 21. august kjem TrAgder med lokal folkemusikk.
– Den 2. september inviterer vi til ein kveld med jusprofessor Jørn Øyrehagen Sunde og forfattaren Tore Renberg i Arendal bibliotek, seier Jan Kløvstad.
Etterkvart vil styret ordne med både Facebook-side og liknande, og trur dette kan bli både kjekt og viktig for dialektarbeidet og nynorsken i Arendal.
Eit løft for mållaga på Agder
– Mållaget tykkjer det er stor stas at vi har fått eit eige Arendal dialekt- og mållag. Vi trur dette vil bli eit løft for mållaga på Agder, seier Peder Lofnes Hauge, leiar i Noregs Mållag. På Arendalsveka i august vil Noregs Mållag saman med andre nynorskorganisasjonar invitere til debattmøte om nynorsk og sidemål.
– Eg gler meg til å invitere til debattmøte med eit nytt lokallag i ryggen, smiler Peder Lofnes Hauge.