Språkpolitisk dagsseminar med Ottar Grepstad
Laurdagsseminar for kritisk nytenking om språkpolitikk
Fylkesmållaga i Møre og Romsdal arrangerer språkpolitisk dagsseminar med Ottar Grepstad i Molde 17. oktober. Seminaret «Vilkåra for nynorskbrukarar og andre mindretal i demokrati» er ope for alle.
Noregs Mållag heidra Grepstad med Målprisen 2025 «for eit livsverk med strategisk og kløktig arbeid for å styrkje nynorsk skriftkultur og institusjonsbygging». Gjennom tre foredrag på seminaret inviterer han til kritisk nytenking om språkpolitikk. Han går djupt inn i dei vanskelege sakene som ventar i lys av 2050-vedtaket på landsmøtet i Noregs Mållag i april. Han ser på ei utsegn av Ivar Aasen som andre språkforskarar og nynorskbrukarar har vegra seg for å snakke om. I 1985 heldt han foredraget «Tretten forsøk på å kritisere målrørsla», og 40 år seinare prøver han på nytt.
På seminaret er emneknaggen hans bokverket «Silkevegar i språk og skrift». Dette kjem ut 8. september, og Grepstad har varsla at dette er den siste trykte boka han gir ut.
– Det vert ordskifte etter kvart foredrag av Grepstad, som vi vonar vil gje oss meir innsikt og handlekraft i målsakarbeidet, seier Øyvind Fenne i Romsdal Mållag. Meir informasjon med program og praktiske opplysningar kjem i neste nummer av Norsk Tidend.