Båhuslen – frå norsk rikssentrum til svensk utkant
Torsdag 4. mai kl. 19.00, Voksenåsen konferansesenter
Eit møte med ein gløymd del av norsk historie. Om eit landskap som var sentral del av Noreg i mellomalderen, men som i dag er borte frå vårt historiske medvit. Vi kjenner det som eit ferieparadis i Sverige og attraktivt mål for innkjøpsturar. Men Båhuslen er full av norsk historie. Det var her Olav Kyrres hadde sitt Haukabø, i dag Håkeby, og det var her Sigurd Jorsalfare gjorde Konghella til maktsentrum i sitt rike, den viktigaste byen i Noreg på 1100-talet. Viktige kampar i den norske borgarkrigen mellom 1130 og 1240 vart utkjempa her. Den norske riksstyraren Gregorius Dagsson vart drepen i eit slag like ved Oddevald, i dag Uddevalla, i 1161. Ved dette landskapet gjekk grensene mellom dei tre nordiske landa. Her møttest kongane. Båhuslen var sentralt i nordiske konfliktar og alliansar, og hadde i seinmellomalderen spiren i seg til å utvikle seg til eit eige ”mellomnordisk” kongerike. Etter freden i Roskilde i 1658 vart Båhuslen svensk. Bohuslän mista betydning og vart ein utkant i Austersjø-orienterte Sverige.
Inngangspengar 100 kr