aktuelt

Søk nynorskstipend!

Nynorskstipend til Ivar Aasen-musikal. Frå venstre: Emilie Swensen, produsent, Peder Lofnes Hauge, leiar i Noregs Mållag, Olav Ødegård, tekstforfattar og Inga Skogseth, leiar i Studentersamfundets Interne Teater. Marcus Grand var ikkje til stades då biletet vart teke. (Foto: Vemund Norekvål Knudsen)

Har du eit godt nynorskprosjekt, men manglar pengar?

Noregs Mållag lyser kvart år ut to nynorskstipend på 50 000 kr, eitt til ei kvinne og eitt til ein mann. I fjor vart eine stipendet til Marcus Grand og Olav Ødegård for å lage manus og musikk til Ivar Aasen-Musikalen på Samfundet i Trondheim.

Det er ei stor spennvidde mellom stipendmottakarane. Sjå lista her. Stipenda skal gå til prosjekt som fremjar nynorsk på område der han frå før er lite brukt. Prispengane er ei løyving frå Kulturdepartementet.

Stipendet er eit arbeidsstipend og kan ikkje nyttast til ordinær utdanning eller til reiser. Det skal leverast ein skriftleg sluttrapport innan prosjektåret er slutt. Stipendiatane må seia seg villige til å leggja fram prosjektet for styret eller andre organ etter nærare avtale.

Styret i Noregs Mållag er stipendnemnd. Søknaden må innehalde problemstilling og mål, arbeidsform/metode, tidsplan, budsjett, CV og ev. referansar til tidlegare arbeid. Frist for å sende inn søknad er 16. februar til nm@nm.no