Nynorskveka 6.–12. mai
Nynorskveka er ei nasjonal markeringsveke for nynorsk. Noregs Mållag og Norsk Målungdom inviterer alle i heile Noreg til å skriva nynorsk denne veka, med ei stor feiring av språket vårt på nynorskdagen 12. mai.
Nynorsk er for alle!
Nynorsk eit nasjonalt språk som alle lærer i skulen. Målet vårt er å ufarleggjera det å skriva nynorsk for dei som sjeldan eller aldri gjer det, og å få sjå meir nynorsk rundt oss, særleg på plassar der me vanlegvis ikkje ser han. Me vonar alle medlemer og lokallag vert med på å spreia ordet!
Korleis markera nynorskveka:
- Skriv nynorsk, og skryt av andre som gjer det
- Les ei nynorskbok
- Kjøp eit nynorsk produkt
- Lik og del nynorsk i sosiale medium
- Syng Nordmannen ( «Mellom bakkar og berg») eller andre nynorske songar
- Stå på stand med lokallaget ditt
- Reis på skulebesøk
- Få skulane i kommunen din til å nytta opplegg frå Nynorsksenteret
- Få biblioteket til å stilla ut og promotera nynorskbøker
- Gå i fotspora til Ivar Aasen. Gjekk han gjennom kommunen din?
- Del ut ein målpris
- Flagg!
- Server nynorskkake eller muffins
- Ønsk kvarandre til lukke med nynorskdagen!
Send oppmodingar!
Noregs Mållag og Norsk Målungdom sender invitasjonar til alle skular, barnehagar og skulebibliotek. Nynorsksenteret har i år laga eit eige undervisningsopplegg. I tillegg utfordrar me statlege verksemder, politiske parti, frivillige organisasjonar, aviser og andre til å skriva nynorsk desse dagane. Mange store namn har vore med dei siste åra, inkludert Vipps, Ruter og kulturministeren.
Lokal- og fylkesmållag bør senda oppmodingar til aktørar lokalt. Det kan vera kommunen, biblioteket, skulen eller barnehagen, ulike frivillige organisasjonar, offentlege personar eller verksemder som ikkje brukar nynorsk til vanleg. Yrkesmållag bør senda oppmodingar til aktørar innanfor eige fagfelt.
Stå på stand / lag tilskiping
I år er nynorskveka frå onsdag 6. mai til tysdag 12. mai. Bruk denne maiveka til å invitera fleire til å verta frivillige i Mållaget, og til å invitera fleire inn i språket. For dei som vil stå på stand, høver det kanskje best på laurdagen, men de står heilt fritt til å velja. Ta kontakt med oss dersom de treng meir tilfang.
Del bilete frå veka i sosiale medium og send dei gjerne til oss! Bruk emneknaggane #nynorskdagen og #nynorskveka på Instagram.
Kvifor nynorskveka?
Nynorskveka startar 6. mai fordi Stortinget vedtok Grunnlova på nynorsk 6. mai 2014. Nynorskdagen er 12. mai fordi Stortinget 12. mai 1885 vedtok å jamstilla landsmål (seinare nynorsk) med dansk (seinare bokmål) gjennom jamstillingsvedtaket.
Kontakt hjå Mållaget: Hege Lothe, informasjons- og organisasjonsrådgjevar
Tidlegare nynorskdagar:
Grafikkar til utskrift og sosiale medium:
